السلام عليكم ورحمة الله


هذه قصيدة ماساة الحياة


و صور من حياة افراد المجتمع ومشاكلهم و معاناتهم


............................



يا حسراه عليك يا الدنيا فيك حكاية وحكايات
ساميني وقعدي حدايا واحكيهم لي بثبات
علاش هكذا حاقدة وسمية ظلي تبدلي في الصفات
تعذبي فيا غير بشوية عييت من عذابك براكات
تلعبي بيا والا معايا جاوبيني علاش هاذ السكات
قالوا لي عليك مسرحية وانا المسرح سكن لي في الذات
التذكيرة خلصتها غالية ديت معايا شي وردات
دخلت للقاعة صفقوا علي طلع ستار والضو طفات
لقيت روحي في تمثيلية والديكور خوف ودعايات
طمعتيني ودورتي عليا عندي جدي بالصحبات



...................


شحال من سلطان كان في دنيا جيوش وأمر وطاعات
مال وعز قصور وسرايا العسة عليه بالألوفات
غفل غفلة تقلبت الحية فليلته مالقى وين يبات
وكلتي فلان عسل وفاكية وفلان شمختي لو الفتات
فلان قلعتي له الذرية وحياته من الفرحة خوات
فلان طلق مرتو المسكينة زعف كي جابت لو البنات


.....................


المسجون يرجى الحرية بالدقيقة يحسب لوقات
الشهار يحلم بالشهرية يا حليلو مولا لوليدات
كبدة لميمة مشوية على واش سهرت واش ربات
على وليدها بدل الجنسية عجبو زين الروميات
خلى يماه وحدانية من الحرقة والبكا تعمات
باش يبين الرجولية بعثلها زوج محرمات


.......................


نهار كانت الدنيا دنيا الوالدين علقوا لهم شيعات
اليوم الوالدين راهي مرمية في مراكز الشيخوخات
انتي دنيا يدك زهــرية انا يدي فيها الكــيـات
مع الواقف درتي جمعية سماها دخلات وخرجات
القليل بعثتي لو خطية جا يصلي تلفت له الصلاة
كي سلم انسى التحية وكي تحى انسى زوج ركعات


...............


المال فاني والعظام راشية فاتت جناس وتمحات
اللي كان تقي ودار النية طاع ربي وشد في الصلاة
درجته في الجنة عالية صفة الجنة درجات
والشاقي يمضي للنهاية ذاتو بالنار تكــسات
جلدة رايحة وجلدة جاية يظل يبدل في الجلدات
نصيحتي نتركها التالية باش نختم بيها لبيات


..................


دعوة الوالدين رسمية منهم الشر والخيرات
الهنا كنز والصحة غالية والباقي كله كذوبات
رشيد ارسلها تحية وامضى فيها بشي دمعات
بعثها ممو برية قراها قيتار وألات
والصلاة على نور عينيا سيد الخلق يا سدات
شكون اللي نجا منك يا دنيا غير اللي طـلقــك بالثلاث


اتمنى ان تنال اعجابكم

واتمنى تكون فهمت كلماتها ومعناها